ROXAS CITY – Nagreklamo sa Bombo Radyo Roxas ang 57-anyos nga fish vendor matapos nga ginaalegar ginkumpiskar sang mga katapo sang Roxas City Environmental Sanitation Enforcement Team (RESET) ang iya ginpatago nga isda sa iya kakilala kag ginpakahuy-an sang isa ka desk officer sang Roxas City Police Station.
Ginkilala ang tagreklamo kay Leonisa Baldevia, sang Barangay Lawaan, Roxas City.
Suno kay Baldevia nga ginbilin sang iya nga bana nga si Joselito Ariza kay alyas Noel ang duha ka kilo nga isda bangud magalakat lamang ini para magpamahaw.
Apang sa pagbalik sang tagreklamo nakibot na lamang ini nga wala na ang duha ka kilo nga isda.
Ginaalegar nga ginkumpiskar sang RESET sa pagpanguna nanday Ricky Dadivas, alyas Advincula kag alyas Bodega ang nasambit nga isda.
Bangud diri ginpadulongan sang tagreklamo ang opisina sang RESET sa Teodoro Arcenas Trade Center para kuntani nga bawion ang nakumpiskar nga mga isda apang wala naman nakahibalo ang pamunuan sang nasambit nga opisina.
Bangud diri, ginpakamaayo na lamang sang tagreklamo nga ipabalhag sa pulisya ang insidente apang wala naman ini nanamian sa nangin sabat sang police officer sa iya gintuad na sini ang natabo.
Sa baylo nga buligan ang tagreklamo ginapahayag nga ginkadlawan pa ini sang iban nga mga police office rason nga naglain ang iya sini buot.
