ROXAS CITY – Nagapabilin nga at-large ang tatlo ka mga suspek nga ginatudlo naghold-up sa isa ka fish vendor sa Sitio Malansa, Barangay Abangay, Tapaz.
Ginkilala ang biktima nga si Arnold Labrador 40-anyos sang Barangay Agpalalai, Tapaz.
Sa inisyal nga imbestigasyon sang Tapaz Municipal Police Station, nagaguwa nga nagapauli na ang biktima sang ginparahan sang tatlo ka mga suspek nga sanday Ariel Olog alyas Ting Y, Jeril Olog 19-anyos kag Jaril Olog 18-anyos lunsay mga residente sang Roxas, Tapaz, Capiz.
Sa pihak nga may tabon nga bayo ang nawong sang mga suspek, apang nakilala sila sang biktima.
Kasunod sa pagpondo sang motorsiklo ni Labrador ang pagtutuk sa iya sang .45 caliber pistol ni Ariel kag 12 gauge shotgun sang duha ka mga kaupdanan.
Natigayon nga mataban sang tatlo ang P24,000 nga benta sang biktima kag gilayon man nga nagpalagyo sa wala matumod nga direksyon.
