ROXAS CITY – Yara na sa kostodiya sang Roxas City PNP ang fish vendor nga nagbuno-patay kay Mario Concepcion 40-anyos sang New Road, Barangay Banica, sining syudad kagab-I sa Washington St., Barangay 7, sining syudad.
Nadakpan ang suspek nga si Jonito Cañas alyas Dakdak 41-anyos residente sang Katipunan Village, Barangay Tiza, sining syudad sa hot pursuit operation sang kapulisan.
Nagaguha sa imbestigasyon sang mga pulis nga dyutayan lamang magbungguanay ang tricycle sang biktima kag suspek.
Posible nga ginkaakig ini sang biktima kag ginaalegar nga ginsumbag sini ang suspek.
Apang lipod sa ihibalo ni Concepcion nga ginbantayan ini ni Cañas kag sang makita hinali nga ginbuno sa dughan.
Gilayon nga nagpalagyo si Dakdak kag ginbayaan ang tricycle nga may karga nga isda, apang nadakpan sa hot pursuit operation sang mga pulis.
Gindala pa sa ospital ang biktima, apang ginbawian ini sang kabuhi samtang ginabulong sa ospital.
