ROXAS CITY – Kasubong nga nakaginhawa sang madalum ang mga vendors nga nagabaligya sa Teodoro Arcenas Trade Center matapos nadakpan sa ginpatigayon nga inspeksyon sang katapu sang Roxas City Environmental Sanitation and Enforcement Team (RESET) kag ginpangkumpiskar ang mga depektuso ukon may daya nga kiluhan sang mga salawayon nga fish, vegetable kag fruit vendors.
Ginpahayag ni Marissa Batan, presidente sang Roxas City Fish Vendors Association nga madugay na ini nga problema sa diin madamo na nga mga bumalakal sa merkado publiko ang nagareklamo nga kulang ang ila ginabakal nga mga isda, prutas ukon utanon.
Pabor man si Batan sa pagkumpiskar sa mga depektoso nga mga kiluhan agud madudla ang iban nila nga mga kaupdanan nga manughingalit.
Aminado ang ginang nga indi sini makontrolar ang iban nga mga kaupdanan kag apisar makapila ka beses na nga ginpahanumdum, wala nagapamati kag ginahimo sa gihapon ang ila gusto.
Bangud sa insedente, plano karon ni Batan nga magpatawag sang sinapol sa MGA miyembro sang asosasyon agud liwat mapahanumdum sang mga pagsulundan.
Nahibaluan nga sa 22 ka mga depektoso nga kiluhan nga nakumpiskar sang RESET, 12 diri ang gikan sa fish section kag 10 naman sa fruit kag vegetable section.
