ROXAS CITY – On-time nga nagsugod ang flag raising ceremony sang mga katapo sang Provincial government sa atubang sang Kapitolyo, subong nga Lunes, Agosto 1.
Sa pagpadulong sang Bombo Patrol team sa lugar, talalupangdon nga quarter to 8, nagasugod na sa pagpuwesto ang mga empleyado sang Kapitolyo probinsyal kag insakto nga alas-8, ginsuguran na ang kada-Lunes nga aktibidad.
Sa kinaangdan, nagahatag sang speech si Governor Fredenil ‘Oto’ Castro, apang subong nga Lunes, wala ini makahatag sang speech, sa baylo, si 1st district board member ‘Pepe’ Del Rosario ang nagdul-ong sag mensahe sa mga empleyado, apang yara ang presensiya sang gobernador kaupod si Vice Governor James ‘Mitang’ Magbanua kag iban pa nga mga board members.
Sa mensahe ni Del Rosario, ginpalab-ot sini nga umpisahan ang adlaw nga mangin positibo nga panan-awan sa trabaho kag ginpahanumdom sini sa mga empleyado nga atipanon ang mga pumuluyo nga magapangayo sang bulig sa Capitol.
