Ginahatagan sang simbahan ang importansya sang tradisyon sang Flores de Mayo bilang isa ka paagi sang pagpalig-on sang debosyon kay Birhen Maria kag pagpatubo sang pagtuo sang mga tumuluo, labi na gid sang kabataan kag pamilya.
Sa interview sang Bombo Radyo kay Fr.Virgilio Fuente Ciudadano Jr.,iya ginpahayag nga ang Flores de Mayo isa ka importante nga tradisyon sang Simbahan Katolika nga ginasaulog kada bulan sang Mayo bilang paghatag dungog kag paghigugma kay Birhen Maria.
Suno kay Fr. Ciudadano, ginahiwat sang simbahan ang selebrasyon paagi sa pagpangamuyo sang rosaryo, paghalad sang bulak, prusisyon kag iban pa nga espiritwal nga aktibidad nga nagapalapit sang mga tumuluo sa Ginoo.
Suno pa kay Fr. Ciudadano, importante ang papel sang simbahan sa pagdumala sang mga aktibidad agud mapadayon ang espiritwal nga kahulugan sang selebrasyon kag indi lamang ini mangin isa ka kultura kundi isa gid ka pamaagi sang pagpalig-on sang relasyon sang tawo sa Ginoo.
Dugang pa sang natungdan, ang Flores de Mayo padayon nga nagahatag inspirasyon kag paglaum sa mga tumuluo samtang ginapadayon ang tradisyon nga ginbilin sang nagligad nga mga henerasyon.
