Nagaproblema ang isa ka food delivery rider kun paano malikawan kag makalikaw sa mga fake booking nga nagalapta sa syudad sang Roxas.
Sa interview sang Bombo Radyo kay alyas Neil, ginsaysay sini ang masami nga na-eksperyensyahan sa mga nagapa-book sang food delivery apang wala man ginakuha.
Nahibaluan nga 4 na ka tuig ini nga nagapang-deliver sang pagkaon kag base sa iya mga naagyan, sa kada bulan sang Disyembre asud-asod ang nagapa-deliver kag amo man ang paglapta sang mga naga-fake booking.
Dugang pa sini, madamo na sila nga nabiktima sang fake booking sa syudad sang Roxas kag tuman nga apektado man ang mga ini bangud may tion nga naga-resulta ini sa suspension sa ila trabaho kag ginapili nalang sang mga ini nga batunon ang ginpataw nga sanction sa ila.
Ginapangabay sini sa mga customer nga kuntani hatagan sila sang konsiderasyon kag respeto ilabi na kun sa tion nga nagaka-delay ang pag-deliver sang mga ini.
