Ginpakahuy-an sang Philippine men’s national football team ang Maldives sa score nga 4-1 sa third round sang AFC Asian Cup 2027 Qualifiers.
Una nga naka-record sang goal si Jefferson Tabinas nga iya ginpasulod sa sulod sang 15 minutos sa hampang nga ginhiwat sa New Clark City Athletics Stadium sa Capas, Tarlac.
Pagkatapos sang pila ka minutos, napasulod ni Bjorn Kristensen para makuha sang Pilipinas ang 2-0 nga abanse sa pagtakop sang first half.
Pagsulod sang second half napasulod ni Ali Fasir sang Maldives ang goal sa sulod sang 62 minutos para makuha ang 2-1.
Sa mga masunod nga minutos napasulod ni Randy Schneider sa sulod sang 77 minutos para makuha ang 3-1 kag sa ika-92 minutos napasulod ni Sandro Reyes ang ulihi nga goal kag maselyo sa 4-1 ang hampang.
Uyat na sang Pilipinas ang 1-0 nga abanse sa Group A kun sa diin masunod nga makaatubang nila ang Tajikistan kag Timor-Leste sa double-round robin.
