Nagtaas ang total foreign investment (FI) pledges nga ginaprubahan sa second quarter sang tuig sa P189.50 billion nagikan sa P59.09 billion sa kapareho nga panahon sadtong 2023.
Sa datos nga ginpaguha sang Philippine Statistics Authority (PSA), ang nasambit nga investment pledges nagikan sa anum nga Investment Promotion Agencies — Board of Investments, BOI-Bangsamoro Autonomous Region in Muslim Mindanao, Clark Development Corp., Philippine Economic Zone Authority, Subic Bay Metropolitan Authority, kag Zamboanga City Special Economic Zone Authority.
Suno sa PSA, ang Switzerland ang pinakadako nga ginahalinan sang investment pledges nga nagabalor sang P172.04 billion ukon 90.8 percent sang kabug-usan nga pledges sa nasambit nga panahon.
Ginsundan ini sang Japan nga may P7.68 billion kag Malaysia nga may P4.53 billion, manufacturing nga may P12.39 billion, kag administrative and support service activities nga may P2.84 billion.
Sa mga rehiyon sa pungsod, ang Negros Island ang nagbaton sang pinakadako nga share sang investment pledges nga nagabalor sang P86.46 billion.
Masunod ang Calabarzon nga may P6.93 billion kag Central Visayas nga may P4.35 billion.
Ginsiling sang PSA nga ang total investment pledges sang foreign kag Filipino nationals, nagdabong sang 125.4 percent sa P715.01 billion nagikan sa P317.23 billion sa second quarter sang 2023 kag ginalauman nga makatipon sang 26,915 nga trabaho.
Dugang pa sini nga sa total investment sa second quarter, ang Filipino nationals ang nag-amot sang P525.51 billion.
