Foreign investments sa Pilipinas, nagtaas kun ipaanggid sang nagligad nga tuig

Mas mataas ang nagsulod nga foreign direct investments (FDI) sa Pilipinas sang Marso 2026 kun ipaanggid sa kaangay nga period sang nagligad nga tuig sandig sa data sang Bangko Sentral ng Pilipinas (BSP).

Narekord sang BSP ang $611 million nga net inflows sang FDI sang Marso.

Mas manubo ini kun ipaanggid sa $638 million sang Pebrero, apang mas mataas kun ipaanggid sa $485 million sang Marso 2025.

Nahibaluan nga ang foreign direct investments ang nagatumod sa capital sang foreign companies kag investments sa mga negosyo sa Pilipinas.

Sa pihak sini, nagalaum ang BSP nga magalab-ot sa $7.5 billion ang kabug-osan nga foreign directs investments sa pungsod subong nga 2026.