Nagapati si former ACT Teachers Party-list Representative nga si France Castro nga may
ikasarang si Senator Francis “Chiz” Escudero nga magserbe bilang presiding officer sa nagahilapit impeachment trial ni Vice President Sara Duterte.
Sa interview sang Bombo Radyo kay Castro, iya ginpahayag nga daku nga bentaha sang mga eksperyensya ni Escudero bilang isa ka abogado kag ang iya ihibalo sa mga butang nga may kaangtanan sa impeachment agud nga matuman niya sang insakto ang iya katungdanan kon mapilian siya pangunahan ang trial.
Suno kay Castro, importante para sa presiding officer nga magpabilin nga impartial
kag bukas sa tanan nga argumento, ebidensya, kag mga dokumento nga igapresentar sang magtimbang nga bahin.
Pahayag pa niya,dapat nga sundon ang gintalana nga mga pagsulundan kag proseso sang impeachment agud mapabilin ang pagsalig sang publiko sa Senado.
Matandaan nga gin-anunsyo ni Senador Panfilo Lacson nga ginaduso nila nga mangin presiding officer Escudero kadungan sang pagpreparar sang Senado sa impeachment trial ni Vice Presidente Sara Duterte.
