Hugot nga ginpanginwala ni Former ACT Teachers Partylist Representative France Castro ang mga alegasyon batok sa iya nga nagbaton ini sang maleta nga may kwarta.
Ini matapos nga malakip ang iya sini nga pangalan kaupod ang pila pa ka mga anay kongresista sa ginbuyagyag sang 18 ka Ex-Marines sa ginpatigayon nga Senate Blue Ribbon Committee hearing sang Cayetano Bloc.
Sa interview sang Bombo Radyo kay Castro, iya ginpahayag nga isa ka pagpatalang ang mga nasambit nga mga alegasyon agud ilihis ang atensyon sang publiko sa mas importante nga isyu kaangay sang nagahilapit nga impeachment ni Vice President Sara Duterte.
Suno kay Castro, imposible nga matabo ang ginaalegar pagbaton nila sang kickback bangud wala sang insertion ang ila nga grupo sa nasambit nga flood control project.
Pahayag pa niya, ang nasambit nga tikang ang maathag nga pagpangguba sang kredibilidad bangud sang ila pagpakigbato sang transparency kag accountability sa gobyerno.
Nagapanawagan man ang natungdan sa publiko nga mangin maalam sa pagtsekyar sang kamatuoran kag pagpanabat sa yara sa likod sang kurapsyon sa pungsod.
