ROXAS CITY – Ginkompirmar sang anay miyembro sang rebelde nga grupo kag aktibista nga si Jeffrey Celiz ukon Alyas “Ka-Eric” nga nagapatigayon sa gihapon sang recruitment ang rebelde nga mga grupo sa pila ka mga indibidwal kag estudyante sa pila ka mga unibersidad kag buluthuan sa probinsya.
Sa interview sang Bombo Radyo Roxas kay Celiz gintumod sini nga kalakip sa mga buluthuan amo ang Filamer Christian University, Colegio de la Purisima Concepcion kag Capiz State University (Capsu-Dumara Campus).
Suno kay Celiz magkatuhay nga mga grupo, organisasyon ukon progresibo nga mga grupo ang naga-enganyo sa pila ka mga indibidwal nga mag-upod sa hanay sang rebelde nga grupo.
Ginpahayag sini nga wala nagauntat kag padayon sa gihapon nga naga-perwisyo ang mga katapo sang Communist Party of the Philippines-New People’es Army ukon CPP-NPA.
Dugang pa sini nga dapat mauntat na ini nga aktibidad agud indi na maapektuhan ang pila ka mga indibidwal partikular na ang mga kabataan.
Ginhatagan man sini pagtamod ang mga ginahimo sang CPP-NPA ukon rebelde nga grupo nga wala sang untat sa pagpamigos kag pagpatigayon sang mga kalakasan kun sa diin madamo na sang kabuhi ang nadula.
Aminado man ini nga sa lamharon pa lamang nga edad nangin katapo na ini sang rebelde nga grupo.
Matandaan nga si “Ka-Eric” ang isa ka military whistleblower kag nag-atubang sang damlag lang sa senate hearing kun sa diin ginsabat sini ang isyu natuhoy sa red tagging.
