Wala nasa kustodiya sang Czech authorities si former Ako Bicol party-list Rep. Zaldy Co, nga nagapangatubang sang kaso nga korapsyon kag malversation may kaangtanan sa ginaalegar ghost flood control project sa Pilipinas.
Ini ang ginkumpirma ni Department of Justice Secretary (DOJ) Fredderick Vida pagkatapos nga nakigkita sa mga opisyal sang Czech Republic, kasunod sang pahibalo ni President Ferdinand Marcos Jr. nga si Co gindakop kag yara na sa kustodiya sang nasambit nga pungsod.
Suno sa Justice Department, yara pa sa Schengen area si Co apang wala ginhatag sang Czech authorities ang iya eksakto nga lokasyon bangud sa data privacy kag Schengen rules.
Dugang pa nga ginalantaw ang posibilidad nga nagbiya si Co sa Czech Republic via land travel kag sunod nga nagkadto sa Germany, Austria, Poland, ukon Slovakia.
Matandaan nga si President Ferdinand Marcos Jr. mismo ang nag-anunsyo sang Abril 16 nga nadakpan si Co sa Czech Republic bangud sang pagtuyo sa pagsulod sa pungsod nga wala sang husto nga documentation.
Sa subong, naga-istoryahanay na ang Pilipinas kag ang Czech Republic angut sa kooperasyon sang kapulisan para sa mas maayo nga koordinasyon agud matumod kon sa diin nagpadulong si Zaldy Co.
