Ginplastar ni Former Bureau of Internal Revenue (BIR) Commissioner Atty. Kim Henares ang iya mga rason kag katuyuan sa pagpapili bilang masunod nga Ombudsman sang pungsod.
Sa interview sang Bombo Radyo, ginpahayag ni Henares nga ang iya desisyon ang bunga sang matuod-tuod nga pagpalangga sa pungsod kag handum nga magpadayon sa serbisyo publiko.
Suno sa iya, ang pagka-Ombudsman ang isa ka importante nga posisyon sa pagpakigbato batok sa korapsyon kag sa pagpabilin sang integridad sang gobyerno.
Gindugang pa ni Henares, nga bisan pa nga nakaserbisyo na siya bilang BIR Commissioner sa panahon sang anay President Benigno “Noynoy” Aquino III, nagapati siya nga may ara pa siya sang mahimo nga kontribusyon sa kahimtangan sang subong nga administrasyon.
Ginsiling pa niya nga handa siya nga ipaambit ang iya malawig nga eksperyensiya sa patad sang kasuguan kag pagdumala sang buwis agud masiguro nga ang mga ahensya sang gobyerno, labi na gid ang Office of the Ombudsman, magapadayon nga matinlo kag epektibo sa ila pagserbisyo.
