Wala ginpaboran ni Former Commission on Audit (COA) Commissioner Atty. Rowena Guanzon ang testimoniya nga ginhatag ni former COA auditor kag testigo nga si Atty. Roderick Wamil sa ginpatigayon nga impeachment trial ni Vice President Sara Duterte.
Sa interview sang Bombo Radyo kay Atty. Guanzon, iya ginpahayag nga pamilyar siya sa procedures sang COA kag nagapati nga ang Notice of Disallowance ang indi dapat automatic nga kabigon bilang proweba nga ang isa ka opisyal sang gobyerno nakahimo sang illegal ukon criminal act.
Suno kay Guanzon, ang Notice of Disallowance gina-issue sa tion nga ginakwestyon sang COA ang paggasto bangud sa kakulang sang proper liquidation documents ukon resibo, ukon bangud nga unnecessary, prohibited ukon excessive ang gingasto.
Apang pahayag niya, indi pa pinal ang Notice of Disallowance bangud may kinamatarong pa ang opisyal nga mag-apela sang desisyon.
Bangud sini, indi pabor si Guanzon sa paglantaw nga ang Notice of Disallowance ang nagahimo sang presumption nga may yara sang krimen nga nahimo.
Suno sa iya, ang principle sang ‘presumption of innocence’ ang mahimo nga i-apply sa mga kaso sang COA disallowance.
Dugang pa ni Guanzon, wala man napamatud-an nga personal nga ginbulsa ni Vice President Duterte ang kwarta sang publiko.
