Nagapati si Former Commissioner Atty. Rowena Guanzon nga ang P6.793 trillion nga 2026 budget sang Pilipinas ang deficit.
Sa interview sang Bombo Radyo kay Guanzon, iya ginpahayag nga kadako sang gina-utang sang pungsod halin sa local sources bangud indi balanse ang pondo kag posible nga magtuga ini sang problema sa palaabuton.
Suno sa iya, wala sang maathag nga layi nga naga-limit sa kun pila ukon paano maka-utang ang gobyerno rason nga ini ang delikado.
Ang Bureau of the Treasury ang naga-utang sang mas mataas kun ipaanggid sa mga naplanohan sa mga local banks kag investors sa diin nagapakita ini ang mabaskog nga demand para sa short-term treasury bills.
Sa treasury bill auctions, sa 91-day bills, 12.6 billion pesos ang gin-raise, nagalapaw sa 9-billion pesos nga target, samtang ang 182-day bills ang nag-raise naman sang 12.6 billion pesos.
Ang kabug-osan nga bids ang mas mataas kun ipaanggid sa ginatanyag sang gobyerno sa diin nagapakita ini sang mabaskog nga interest gikan sa domestic lenders.
Sandig naman sa mga eksperto, ang demand para sa government securities ang nagikan sa mga investors nga luyag nga maka-secure nga may balik sa ila antes nga i-cut sang Bangko Sentral ng Pilipinas ang ila interest rates.
Dugang pa ni Atty. Guanzon, matuod nga makabulig ang pag-utang sa local banks agud nga ma-cover ang deficit sa short term, apang dapat nga mangin mahinalungon ang gobyerno.
Kun wala sang insakto nga oversight, ang pag-utang ang mahimo nga mangin dako nga problema nga makaapekto sa ekonomiya kag public services.
