Kapin sa isa ka gatos ka milyon ka pesos nga balor sang kwarta ang ginbalik kahapon nga adlaw ni Former Department of Public Works and Highways District Engineer Henry Alcantara sa Department of Justice.
Makita sa video nga nakuha sang Bombo Radyo Philippines sa sulod sang departamento ang dako nga kantidad sang kwarta nga personal nga ginbalik sang anay opisyal kaupod ang iya abogado.
Suno kay Justice Acting Sec. Fredderick Vida, nagalab-ot sa 110 milyon pesos ang kabug-usan nga kantidad nga ginturn-over ni Alcantara sa amo nga departamento.
Pahayag pa sini nga ang dalagku nga kantidad sang kwarta nga gindala ni Alcantara ang halin sa iya ginkawat ukon nakuha sa mga maanomaliya nga flood control projects sang gobyerno.
Kabahin ini sang gin-alegar ginpromisa nga ‘restitution’ nga may kabug-usan nga balor nga 300-million pesos suno sa tiglikom.
Dugang pa sang tiglikom nga ini nga tikang nga ginhimo ni Alcantara nga involved sa flood control scandal ang isa sa mga kondisyon agud mapilian bilang ‘state witness’.
Nagalaum ang kampo ni Alcantara nga ang pagbalik sang kwarta ang makabulig sa iya nga mapilian bilang state witness sa amo nga kaso.
