Former DPWH Sec. Manuel Bonoan, hugot nga ginpanginwala nga may kahilabtanan siya sa maanomaliya nga mga flood control projects

Hugot nga ginpaninwala ni anay Department of Public Works and Highways (DPWH) Secretary Manuel Bonoan nga may kahilabtanan siya sa maanomaliya kag palpak nga flood control projects.

Suno kay Bonoan, wala siya sang involvement sa mga iregularidad sa ahensiya.

Pahayag niya, ang rason sang iya pagpanaog sa pwesto amo agud mangin transparent kag mangin accountable bangud sa kontrobersiya nga ginapangatubang sang DPWH may kaangtanan sa ghost kag substandard nga mga flood control projects.

Una na nga ginpahayag ni Presdiente Ferdinand Marcos Jr. nga command responsibility ang rason sang pag-resign ni Bonoan. Nahibaluan nga nagtambong si Bonoan sa hearing sang House Infra Committee nga naga-imbestigar sa mga maanomaliya nga infrastructure projects.

Ginpamangkot ang anay tiglikom kun may matudlo siya nga mga tawo ukon makahatag sang pangalan nga maangot sa anomaliya, apang sabat niya, wala siya sang kinamatarong nga magbuya sang mga pangalan bangud wala na siya nagapangalagad sa ahensya.