Ginkumpirmar sang Bureau of Immigration (BI) nga yara subong sa gwa sang Pilipinas si anay House Speaker Lord Allan Velasco.
Suno sa opisyal nga pahayag sang BI, wala sang nagaluntad nga Hold Departure Order (HDO) ukon ano man nga derogatory alert batok kay Velasco nga magapugong sa iya sa pagbiya sa pungsod, apisar nga nagpamalibad ang bureau nga maghatag sang dugang nga detalye bangud sa Data Privacy Act.
Suno kay National Bureau of Investigation (NBI) Director Melvin Matibag, naglupad si Velasco padulong sa Nagoya, Japan sang Agosto 30 kag natalana kuntani nga magbalik sa Setyembre 14, apang wala sang record nga nakapauli ini sa pungsod.
Ginpahayag man ni Matibag nga naglakat ang asawa ni Velasco padulong sa Hong Kong kaupod ang duha ka indibidwal sang Setyembre 24, kag wala man sang rekord sang ila pagbalik humalin sang natalana nga petsa sa Setyembre 27.
Ini nga mga report ang nag-abot matapos nga nag-atubang sa NBI ang anay security aide ni Velasco nga si anay police officer Rodulfo Gracioso Jr. angot sa iya alegasyon nga masobra P2 billion ang iya gindul-ong kay Vice President Sara Duterte, P1 billion kay anay Presidente Rodrigo Duterte, kag P100 milyon kay Rep. Paolo Duterte sa mandu sang anay Speaker halin sang 2018.
