Napamatud-an nga guilty beyond reasonable doubt sang Sandiganbayan si anay Maguindanao Governor Datu Sajid Ampatuan sa kaso nga graft kag malversation sang public funds may kahilabtanan sa P400 million nga pondo nga nakapain para sa konstruksiyon kag rehabilitasyon sang 22 farm to market roads sadtong 2009.
Sa 66 ka panid sang desisyon sang anti-graft court nga ginpakigbahin sini nga Lunes, ginpamatbatan sang Sandiganbayan si Ampatuan sang tubtob 40 ka tuig nga pagkapriso sa kaso nga malversation kag may multa kag restitution nga nagabalor sang PHP786 million.
Ginpamatbatan man ini sang tubtob 12 ka tuig para sa separado nga kaso sang paglapas sa Anti-Graft and Corrupt Practices Act.
Duha naman sa mga kapareho nga akusado ni Ampatuan, ang provincial treasurer nga si Oscar Bandila kag provincial accountant nga si John Dollosa ang nagapabilin nga hilway.
Ang pang-apat nga kapareho nga akusado nga provincial auditor nga si Danny Calib ang gin-acquit sang korte.
Suno sa prosekusyon, na-download ni Bandila ang mga kantidad pinaagi sa cash advances, apang napaslawan nga magsumiter sang mga documentary reports kag liquidation documents kaangut sang mga disbursement.
Ang akusado nga si Ampatuan naman gingamit ang iya nga posisyon kag pamaagi nga may paglapas sa layi kun sa diin gingamit sini ang kantidad nga nakapain para sa nasambit nga proyekto.
