Indi magtambong si former President Rodrigo Duterte pinaagi sa video conference sa nakatalana nga confirmation of charges hearing sa Pebrero 23, suno sa iya abogado nga si Atty. Nicholas Kaufman.
Suno kay Kaufman, indi man boluntaryo nga nag-atubang ang anay Presidente paagi sa video link sa iya initial appearance.
Pahayag niya, ginbalibaran ang ila hingyo nga i-postpone ang una nga hearing agud nga makatambong ang anay presidente sa personal kag matalakay ang isyu sang legal competence sini.
Nagpanginwala naman ang lead counsel sa pagsabat kun maga-atubang sang personal ang anay Presidente ukon i-waive ang iya kinamatarong nga magtambong.
Base sa abiso sang International Criminal Court (ICC), ang hearing hiwaton alas 10 sang aga tubtub alas 3 sang hapon, oras sa The Hague (5 pm to 10 pm sa Pilipinas), sa Pre-Trial Chamber I.
Sa tion sang hearing, ang prosekusyon, depensa, kag mga abogado sang mga biktima ang pagahatagan sang gintalana nga tion sa pagpresentar sang ila mga argumento.
Tinutuyo sang confirmation hearing nga hibaluon kun bala may yara sang bastante nga ebidensya agud mapadayon ang kaso sa Trial Chamber para sa full trial.
Ini naman ang pagasundan sang mga hearing sa Pebrero 24, 26 kag 27.
