Makapila na ka beses nga nagpahanumdom ang anay punong barangay sa Barangay Dumulog, Roxas City sa caretaker antes pa man matabo ang insidente kun sa diin ginbawian sang kabuhi sang isa ka menor de edad nga babaye matapos ginaalegar nakuryente sa live wire nga gin-angut sa kudal sang isa ka balay sa nasambit nga barangay.
Ang biktima amo si alyas “Angel”, residente sang New Road, Banica, Roxas City.
Sa interview sang Bombo Radyo Roxas kay former Punong Barangay Richard Mario Artillero iya ginpahayag nga antes ang insidente nakit-an pa niya nga nagasiga ang resthouse, rason nga kumpirmado niya nga may suplay sang kuryente ang propedad.
Ini matapos ginpanginwala sang caretaker nga wala sang kuryente ang lugar kag wala sang live wire nga ginpahamtang sa kudal.
Suno kay Artillero, madugay na ginahingyo sini sa caretaker nga kuhaon ang live wire bangud delikado ini, ilabi na nga madamo sang nagalabay nga mga estudyante, residente kag mga nagakadto sa baybay.
Pahayag pa niya, sang makita niya ang kahimtangan sang biktima, gilayon niya nga ginpautod ang live wire nga nakakonekta sa abandonado nga resthouse kag nagpanawag sang emergency responders.
Dugang pa sini, wala sang warning sign ukon ano man nga patimaan sa kudal nga makapaandam kuntani sa publiko sa posible nga peligro.
Sa subong padayon ang imbestigasyon sang Roxas Component City Police Station agud matumod kon may kriminal liability bala ang caretaker kag ang tag-iya sang propedad sa kamatayon sang menor de edad.
