Posible nga magaatubang si Former Senator Antonio Trillanes IV sa masunod nga impeachment proceedings sang House Committee on Justice batuk kay Vice President Sara Duterte nga natalana sa Abril 22 kag 29, 2026 bilang isa sa mga resource person.
Sa interview sang Bombo Radyo kay Representative Renee Louise Co sang Kabataan Party-list, iya ginpahayag nga magadugang pa sa pagbuyagyag sang nasambit nga iregularidad sa talatapan sang Vice President ang amo nga resource person.
Suno kay Co, nakitaan sang mabug-at nga mga alegasyon sa sala nga paggamit sang pondo sang kaban ang Office of the Vice President sa ika-duha nga impeachment proceedings sang amo nga komitiba kun sa diin ginbuyagyag ini sang Commission on Audit.
Pahayag niya, dako man ang nangin papel sang self-confessed bagman ni Vice President Sara Duterte nga si Ramil Madriaga sa pagpatpat sini sa kun paano nga gingastos sang Vice President ang P125 million confidential funds kag iban pa nga pondo sang talatapan.
Dugang pa sang natungdan, sa masunod nga impeachment proceedings, paga-usisaon na ang Statement of Assets, Liabilities and Networth (SALN) ni Vice President Sara Duterte, subong man ang bank accounts ni Madriaga agud makita ang transactions sang ginapahayag cash flow nga gina-deliver ni Madriaga.
Nagalaum naman ang natungdan nga sa masunod nga hearing, magatambong kag magaatubang na si Vice President Sara agud nga maathag ang mga alegasyon kag mahatagan sang kaathagan ang publiko.
