Gin-athag ni former Senate President Francis “Chiz” Escudero nga wala sang kahilabtanan sa ano man nga political accommodation ukon kabaylo nga pabor sa iya pagtambong sa sesyon sang Senado sang Hunyo 3.
Suno kay Escudero, nagtambong siya agud masiguro nga maporma ang quorum kag mapadayon ang session suno sa nasaad sa Konstitusyon matapos ang pila ka adlaw nga delay sa plenary proceedings.
Ginpanindugan man sang senador nga indi dapat i-angut ang iya mga tikang sa senado sa mga reklamo nga iya ginapangatubang sa Office of the Ombudsman angot sa ginaalegar maanomaliya sa flood control projects.
Ginhatagan niya pagtamod nga nagapabilin nga hilway kag independent ang Senado kag indi dapat maimpluwensyahan sang executive branch sang gobyerno.
Madumduman nga ang pagtambong ni Escudero sa sesyon nagbukas sang dalan para sa pagporma sang quorum, nga nagdul-ong sa panibag-o nga tensyon sa liderato sang Senado sa tunga sang kampo nanday Sen. Sherwin Gatchalian kag Senate President Alan Peter Cayetano.
