Ginpanginwala ni anay senador Ramon “Bong” Revilla Jr. sang Sabado ang iya pagkalakip sa “ghost” flood control projects sa Bulacan matapos nga siya nangin isa sa respondent sa duha ka reklamo nga ginsumiter sa Department of Justice (DOJ).
“Ang naratibo na pilit nilang ikinakasa laban sa akin ay hindi lamang kasinungalingan, ito’y sadyang ‘di kapani-paniwala,” siling ni Revilla sa isa ka post sa Facebook.
“I am an easy target being used to muddle the truth, but the truth will always come out,” dugang pa sang anay senador.
Sunod sa DOJ, gin-identify sanday Revilla kag anay Ako Bicol party-list representative Zaldy Co bilang “proponents” sang mga flood control project sa Bulacan. Gin-upod si Revilla sa isa sa mga reklamo, nga may kaangtan sa SYMS Construction.
Sang sini nga semana, ginrekomenda sang Independent Commission for Infrastructure (ICI) sa Office of the Ombudsman ang pagpasaka sang kaso batok kay Revilla kag iban pa base sa mga testimonya nga ginhatag sang anay Public Works and Highways Undersecretary nga si Roberto Bernardo.
Una nga gin-akusar ni Bernardo si Revilla sang pagbaton sang 25% nga komisyon halin sa flood control projects, isa ka akusasyon nga ginpanginwala sang anay senador.
Sunod sa lihok sang ICI, ginpanghinublag sang tagpamaba sang pamalatian ni Revilla nga wala nakabaton ang anay senador sang imbitasyon gikan sa fact-finding body nga magpaliwanag.
Samtang, ginpahayag ni Prosecutor General Richard Fadullon nga naghangyo ang pihak sang senador sang dugang nga tion sa pagsumiter sang iya counter-affidavit.
