Preso na sa Quezon City Jail Male Dormitory (QCJMD) si Former senador Ramon “Bong” Revilla Jr matapos nga nagpagwa sang commitment order ang Sandiganbayan suno sa Department of the Interior and Local Government (DILG).
Ini ang may kaangtanan sa ginaalegar kahilabtanan sang anay Senador sa ₱92.8 million nga ghost flood control project sa Pandi, Bulacan.
Suno sa DILG, gindala si Revilla sa QCJMD mga alas 2:28 sang hapon kahapon nga adlaw.
Ginpanindugan sang ahensya nga ginatratar kag ginahatagan sang pareho nga seguridad si Revilla kaangay sang iban nga persons deprived of liberty (PDL), santo sa nagaluntad nga mga kasuguan kag pagsulundan.
Suno kay Bureau of Jail Management and Penology (BJMP) spokesperson Superintendent Jayrex Bustinera, ang detention cell ni Revila may kadakuon nga 47 square meters. May lima ini ka double-deck nga mga katre kag isa ka comfort room nga may shower.
Ginpahayag nga ang nasambit nga selda ang maka-akomodar sang tubtob 10 ka tawo, apisar nga indi pa maathag kun may iban pa nga PDLs nga nalakip.
Dugang pa ni Bustinera nga ang QCJMD may kabug-usan nga 3,612 ka mga detainees antes mag-abot si Revilla, kag ang anay senador ginbutang sa “general population” nga lugar sang prisuhan.
Samtang, sa nauna nga press briefing, ginpahayag ni DILG Secretary Juanito Victor “Jonvic” Remulla nga indi na mahimo nga ibutang si Revilla sa Camp Crame Custodial Facility nga masami ginatigana para sa mga high-profile personalities.
Gin-athag ni Remulla nga natalana nga gub-on ang nasambit nga pasilidad subong nga bulan agud mahatagan sang dalan ang pagtukod sang bag-o nga imprastraktura.
