Ginbuyagyag ni former Senator Antonio Trillanes IV nga ginaalegar nakabaton sang kwarta ang pamilya Duterte halin sa gintawag niya nga “drug lord” nga si Sammy Uy pinaagi sa manager’s checks.
Sa ginpakita nga presentasyon sa House Committee on Justice, naglab-ot sa P181.6 million ang mga transaksyon nga ginaalegar ginbayad sa pila ka mga miyembro sang pamilya Duterte humalin 2011 tubtub 2013.
Lakip sa mga nakabaton sanday Vice President Sara Duterte, Davao City Mayor Sebastian Duterte, Davao City 1st District Representative Paolo Duterte Honeylet Avanceña, Veronica ‘Kitty ‘Duterte, kag former President Rodrigo Duterte.
Gin-angot man ni Trillanes si Uy sa pila ka mga kontrobersyal nga personalidad kag isyu, lakip na ang anay economic adviser nga si Michael Yang kag mga alegasyon sa Pharmally kag Philippine Offshore Gaming Operations (POGO).
Hugot man nga ginpanginwala kag ginkwestyon sang bahin ni Vice President Duterte ang pila ka mga alegasyon, samtang padayon nga ginatun-an sang komitiba sa Kamara ang mga isyu may kaangtanan sa impeachment complaint.
