Temporaryo nga ipatuman sang gobyerno ang Four-day work week sa pila ka mga executive offices umpisa Marso 9, 2026.
Apang gin-athag ni President Ferdinand Marcos Jr. nga wala nagalakip sang mga opisina nga nagahatag sang emergency kag frontline services kaangay sang pulis kag bombero.
Magluwas sini, ginmanduan man sang Presidente ang tanan nga ahensya sang gobyerno nga magkinot sa pagkonsumo sang kuryente kag gasolina kag dumilian ang mga indi kinahanglan nga biyahe kag aktibidad sang gobyerno.
Ginhatagan pagtamod ni Marcos, nga pangayuon niya sa Kongreso ang gahum agud temporaryo nga mabuhinan ang excise tax sa mga produktong petrolyo.
Ini kon maglab-ot sa 80 US dollars kada bariles ang presyo sang langis sa international market.
Katuyuan sini nga matapna ang sobra nga pagsaka sang presyo sang gasolina kag diesel sa pungsod.
Nagpagwa man sang memorandum circular ang Palasyo nga ginpirmahan ni Executive Secretary Ralph Recto angut sa four- day work week.
