Magapabilin sa kustodiya sang International Criminal Court (ICC) sa The Hague, Netherlands si former President Rodrigo Duterte samtang ginahulat ang pagsugod sang iya trial may kaangtanan sa kaso nga crimes against humanity.
Sa ila desisyon, ang ICC Trial Chamber III nagsiling nga ang mga obserbasyon nga ginsumite sang depensa kag sang ICC Registry nahanungod sa ikaayong lawas sang anay presidente wala nagabug-os sang bag-o nga ebidensya ukon pagbag-o sa nauna nga kondisyon nga gin-usisa sang una nga medical expert nga gin-appoint sang korte.
Ginhatagan pagtamod sang ICC nga ang ginaalegar pagpamilit ni Duterte nga wala niya ginakilala ang jurisdiction sang ICC nagapakita nga indi siya magtuman sa ano man nga mando angut sa iya posible nga paghilway sa kustodiya.
Ginpahayag man sang korte nga bangud sa iya malapad nga koneksyon, impluwensya, kag suporta gikan sa mga kaalyado kag pamilya sa Pilipinas, may yara sang “matuod kag daku nga risgo” nga mahimo siya magpalagyo ukon mag-upang sa hustisya kon ini ang hilwayon.
Dugang pa sang ICC, bisan pa nga may yara sang health issues ang anay presidente, indi pa ini bastante agud malampuwasan ang risgo nga gintumod sang korte angut sa posible nga paglikaw sa proseso sang trial.
Una na nga ginpahayag sang ICC Registry nga yara sa cell monitoring ang 81 anyos nga si Duterte bangud sa iya edad kag pila ka mga chronic health conditions nga nagahatag sang mas mataas nga fall risk samtang yara sa detention.
