ROXAS CITY – Ginadumilian sang gobyerno sang France ang paghaboy sang sigarilyo kag pag-ihaw-ihaw sa mga lugar nga posible tunaan sang malawakan nga grassfire sa pungsod bangud sa mainit nga panahon.
Ini ang ginpahayag ni Jennefer Floro Faldas, Bombo International Correspondent sa Paris, France sang mainterview sang Bombo Radyo.
Suno kay Faldas nagdangat na sa 44 degree celcius ang temperatura sa ila nga lugar pinakamataas nga na rekord kumparar sa nakaligad nga mga tinuig kag possible nga magataas pa sa 46 degrees sa mga masunod nga inadlaw.
Pahayag sini bangud sa tuman nga kainit sang panahon may nagluntad nga grassfire sa bahin sang South Western France kun sa diin 16,000 ka mga indibidwal ang ginrescue kag gin-evacuate sang 14 ka mga departamento bangud sa sunog.
May yara man sang pila ka mga insidente nga nagakalalipong ang mga pumuluyo bangud sa init sang panahon.
Kaangot diri, ang bulan sang Hulyo ang “most awaited” nga bulan sang mga French national bangud ini ang pagsugod sang duha ka bulan nga tig-ilinit kun sa diin ginadagsa ang mga kadagatan sa amu nga lugar kag magpa-init.
Dugang pa ni Faldas, nga may yara sangg nakastandby nga mga emergency team sa mga matawo nga lugar pananglitan may yara sang insidente nga matabo kag gilayon nga marespondehan.
