ROXAS CITY -Ginkompirmar sang spokesperson sang Bureau of Fire Protection Region 6 nga ginrelieve na sa puwesto bilang Regional Director si Fire Senior Superintendent Roderick Aguto.
Suno kay Fire Senior Inspector Stephen Jardeleza nga subong nga adlaw Hunyo 17, 2020 ginrelieve na puwesto si Fire Senior Superintendent Roderick Aguto sandig sa ginpaguwa nga Bureau Order REA 2020-098 nga ginpirmahan ni Fire Director Jose Embang Jr.
Nagtal-us bilang caretaker sang BFP Region 6 si Fire Senior Superintendent Atty. Jerry Candido, Director of Logistics sa BFP National Headquarters kag isa man ka ilonggo.
Suno kay Jardeleza nga ginsaylo si Aguto sa BFP National Headquarters sa Metro Manila.
Samtang gin-athag ni Jardeleza nga mismo si Aguto ang naghinyo nga marelieve sa puwesto kasunod sang pagkaulamid sang iya pangalan sa kontrobersiya nga ginkadalahigan sang isa ka BFP personnel nga nagpositibo sa Covid-19 nga nakapadulong pa sa Isla sang Boracay sa pihak nga wala pa nakaguwa ang resulta sang test sini.
