Madinalag-on nga ginpatigayon sang Philippine Coast Guard (PCG) kag Bureau of Fisheries and Aquatic Resources (BFAR) ang fuel subsidy mission para sa mga Filipino fishermen sa Bajo de Masinloc (Scarborough Shoal).
Natigayon ini sa pihak sang makatalagam nga pagpang-harass kag pag-atake sang water cannon sang China Coast Guard (CCG).
Suno kay PCG spokesperson for the WPS Rear Admiral Jay Tarriela, ginpalupok sang China Coast Guard ang isa sa mga barko sang Pilipinas gamit ang water cannon kag nagpatigayon man sang delikado nga blockade sa isa pa ka PCG vessel.
Sa pihak sang insidente, wala sang may napilasan sa bahin sang Pilipinas kag madinalag-on nga napanghatag sa mga mangingisda ang fuel subsidy kag food packs.
Ang misyon ang kabahin sang Kadiwa ng Bagong Bayaning Mangingisda (KBBM) initiative, nga nagatuyo sa pagsuporta sa palangabuhian kag pagsiguro sang seguridad sang mga lokal nga mangingisda sa West Philippine Sea.
