Ginpasalig ni Department of Social Welfare and Development Region 6 Director Joselito Estember nga magapadayon ang iya pagserbisyo sa publiko pinaagi sa paghatag sang bulig kag suporta sa mga pumuluyo sang Western Visayas.
Ini matapos gin-appoint ini bilang full fledged regional director sang nasambit nga ahensya.
Sa interview sang Bombo Radyo kay Director Estember, iya ginpahayag nga ang mangin una nga responsibilidad niya amo ng pagsunod sa mandato sang DSWD sa diin kinanglan niya mapadayon ang paghatag sang suporta ilabi na sa benepisyaryo sang Pantawid Pamilyang Pilipino Program (4Ps) bangud madamo sang ma-gradwar subong nga tuig.
Suno kay Estember, ginasiguro gid sang ahensya nga nangin epektibo ang pagpatuman sang programa pinaagi sa monitoring kag evaluation agud masiguro nga ang bulig nagakadto sa mga pamilya nga nagakinahanglan.
Dugang pa sang natungdan, ang mga programa sang DSWD indi lamang limitado sa paghatag sang cash, kundi nagatuyo man ini nga magahatag sang palangabuhian kag masiguro ang may pag-uswag ang mga benipisyaryo.
