ROXAS CITY -Ginabasol sang tag-iya sang G-Arabia Platinum Construction and Development Company ang kapaslawan sini nga makakuha sang construction permit sa pagka-atrasar sang konstruksyon sang dalan sa San Roque Street, Barangay Inzo Arnaldo, Roxas City.
Sa interview sang Bombo Radyo sa kay Mr. Gin Arabia tag-iya sang nasambit nga construction company, ginpahayag sini wala siya ang ihibalo nga kinahanglan pa magsumiter sang construction permit sa City Engineers Office antes magsugod sang pila ka mga proyekto sa siyudad.
Suno kay Arabia nga gintinguhaan sang iya talatapan nga mag-comply sang mga rekisitos nga kinahanglan sang siyudad apang nakibot ini sang ginpahayag sang nasambit nga talatapan nga may mandu gikan kay City Mayor Ronnie Dadivas nga i-hold ang ila nga mga papeles.
Ginabasol sini ang talatapan sang City Engineers Office nga wala ini gin-abisohan nga magkuha sang construction permit.
Samtang ginkwestion ni Arabia ang pag obligar sa iya sang amo nga talatapan nga magsumiter sang certificate of completion nga isa sa rekisitos sa pagkuha sang construction permit.
Suno kay Arabia nga wala sa Ordinance No. 46-2016 ang nasambit nga rekisitos rason nga nakapanumdum ini nga gina-ipit lamang siya sang gobyerno sang siyudad.
