ROXAS CITY – Ginhatagan sang pinakamanubo nga iskor sang grupo nga Gabriela Capiz ang pagpamuno ni Presidente Ferdinand “Bongbong” Marcos Jr., sa Pilipinas.
Sa interview sang Bombo Radyo kay Monica Cabantug tagpamaba sang Gabriela Capiz, ginpahayag sini nga instakto lamang nga hatagan sang 1 out of 10 si Marcos nga iskor bangud madamo sang iya nga mga ginpromisa sang nagapapili pa lamang ini sa pagkapresidente ang wala nagtupa.
Una na diri ang pagpanubo sa presyo sang bugas nga suno kay Marcos mahimo nga mabakal sa merkado sa presyo nga P20.00 tubtob P30.00, ika-duha ang pagdugang sang sweldo sa mga empleyado apisar suno kay Cabantug nga nagpasaka sang P40.00 sa sweldo indi sa gihapon ini bastante bangud kadungan sang pagtaas sa sweldo gulpi man nga naghabok ang presyo sang mga balaklon ilabi na ang mga kinahanglanon sang tagsa-tagsa sa kada adlaw.
Suno kay Cabantug, kun tani unahon nga tutukan ni Presidente Marcos ang estado sang mga mangunguma bangud sila ang naga-antos sang matuod agud may yara sang kalan-on ang mga Pilipino.
Mahibaluan nga sadtong eleksyon pa lamang, indi na luyag ang grupo nga Gabriela nga magadaog si Marcos bangud indi sila luyag suno diri nga pamunuan sang isa ka makawat ang Pilipias.
Sa patigayunon nga State of the Nation address ni Presidente Marcos, magapatigayon sila suno diri sang rally sa Roxas City, Plaza agud ipalab-ot sa presidente ang ila hibubun-ot nga kinahanglang mabatian sini kag mahatagan sang solusyon.
Apisar nga may pila pa ka tuig si Marcos sa iya termino, indi na sila suno diri makahulat pa kun anu ang sarang sini nga mahimo bangud sa iya pagpungko bilang amay sang Pilipinas kun tani suo kay Cabantug ginsuguran na niya ini.
Samtang, tuman sila suno diri nga nadismaya sa nangin performance sang president sa sulod sang isa ka tuig.
