Ginpakamalaut sang Gabriela-Capiz ang presensya sang militar sa probinsya, nga suno sa grupo nagahatag sang kahadlok kag kabalaka sa mga komunidad, ilabi na sa mga kababain-han, kabataan kag iban pa nga sektor.
Sa interview sang Bombo Radyo kay Monica Cabantug, spokesperson sang Gabriela-Capiz, iya ginpahayag nga may mga komunidad nga apektado sang presensya sang mga miyembro sang militar kag ini kinahanglan nga tutukan sang gobyerno.
Suno kay Cabantug, importante nga masiguro ang seguridad kag kinamatarong sang mga pumuluyo kag malikawan ang mga tikang nga mahimo magresulta sa pagpugong sa ila kahilwayan sa pagpahayag sang ila mga reklamo kag panindugan.
Nagalaum man ang natungdan nga mangin mas matinlo kag transparent ang mga tikang sang mga ahensya sang gobyerno sa pagpatuman sang seguridad sa probinsya kag masiguro nga indi malapas ang mga kinamatarong sang mga pumuluyo.
