Nagkuha sang ikaduha nga sunod nga kadalag-an sang Atlanta Hawks matapos nila mapierde ang New York Knicks score nga 109-108, sa Game 3 sang ila first-round playoff series.
Ginpangunahan ni CJ McCollum ang Hawks matapos makaiskor sang 23 points, lakip na ang game-winning shot nga iya naipasulod samtang 12.7 segundos na lang ang nabilin sa duwa. Bangod sini, naglamang ang Atlanta sa serye, 2-1 lead.
Naglamang anay ang Hawks sang 96-85 sa fourth quarter, apang nakahabol ang Knicks kag natabla ang duwa sa 105-105 matapos ang three-pointer ni Miles McBride. Nagsunod naman si Jalen Brunson nga naghatag sang abanse sa New York paagi sa three-point play.
Apang nakabawi ang Atlanta sang nakapuntos si Jalen Johnson agud mapalapit ang iskor, antes tuluyan nga naipasulod ni McCollum ang panalo nga tira. Wala na nakaiskor ang Knicks sa ila katapusan nga play matapos maagaw sang Hawks ang bola tubtob nagtingog ang buzzer.
Nagdugang si Johnson sang 24 points, 10 rebounds kag walo ka assists, samtang nag-ambag man si Jonathan Kuminga sang 21 points halin sa bench.
Sa bahin sang Knicks, nanguna si OG Anunoby nga may 29 points, gin-updan ni Brunson nga may 26 points, kag ni Karl-Anthony Towns nga nagtala sang 21 points kag 17 rebounds.
Pagahimuon ang Game 4 sang best-of-seven series sa Sabado sa Atlanta.
