Nagpahayag sang pagkabalaka si Senador Sherwin Gatchalian sa posible nga pagsaka sang suktanay sa kuryente, nga ginapaabot nga dugang nga magapabug-at sa pinansyal nga kahimtangan sang mga pumuluyo nga nagaantos na bangod sa nagataas nga inflation sa pungsod.
Ginhatagan pagtamod sang senador nga ang posible nga pagsaka sang presyo sang kuryente magadugang sa palas-anon sang mga panimalay, ilabi na nga nagapadayon man ang pagsaka sang presyo sang mga panguna nga kinahanglanon kag serbisyo.
Suno sa Manila Electric Company (Meralco), naglab-ot sa ₱15.0615 kada kilowatt-hour (kWh) ang singil sa kuryente subong nga Oktubre. Mas mataas ini sang ₱0.3191 kada kWh kun ikumparar sa ₱14.7424 sang Septyembre.
Ginpahayag sang kompanya nga ang pagsaka sang balayran may kaangtanan sa mataas nga presyo sang gasolina kag iban pa nga mga gatong nga ginagamit sa paghimo sang kuryente.
Samtang, suno sa Philippine Statistics Authority (PSA), naglab-ot sa 7.2 percent ang inflation sang Setyembre, nga amu ang pinakamataas nga lebel nga nabalhag sa sini nga tuig, suno sa ginapahayag nga datos sa report.
Ginsambit man ni Gatchalian nga ang presyo sang kuryente sa Pilipinas amu ang ikaduha nga pinakamahal sa Southeast Asia, sunod sa Singapore.
Ginbuyagyag man sang senador ang mataas nga sukot sa kuryente sa mga rehiyon sang Visayas kag Mindanao, bisan pa sa masami nga pagdeklarar sang yellow alert kag red alert sa mga power grid. Suno sa iya, isa sa mga posible nga kabangdanan amu ang indi maayo nga operasyon sang mga transmission line nga naga-angut sa nagkalain-lain nga rehiyon.
Gindugang ni Gatchalian nga indi dapat pasagdan ang amu nga sitwasyon kag kinahanglan nga may yara sang konkreto nga mga solusyon agud maminusan ang palas-anon sang mga konsumidor.
Bangud sini, ginmanduan sang senador ang Department of Energy (DOE) kag ang Energy Regulatory Commission (ERC) nga usisaon sang maid-id ang mga fuel pass-through charges nga ginatudlo nga isa sa mga kabangdanan sang mataas nga balayran sa kuryente.
