Nagapanawagan ang General Alliance of Workers Association (GAWA) nga gilayon iduso ang hagna nga “Fuel Wage Shock Protection Law” agud nga mahatagan sang gilayon nga proteksyon kag dugang nga bulig-pinansyal ang mga minimum wage earner sa tunga sang padayon nga pagtaas sang presyo gatong kag sang mga nagapanguna nga balaklon.
Sa interview sang Bombo Radyo kay Wennie Sancho, Secretary General sang General Alliance of Workers Association, iya ginpahayag nga panahon na agud repasuhon ukon dalayon nga gub-on ang Regional Wage Board bangud sa ginapahayag kapaslawan sini nga mahatagan sang madasig nga aksyon ang mga ginakinahanglan sang mga mamumugon sa tunga sang economic crisis.
Suno kay Sancho, sa idalom sang sa subong nga sistema, nagakalab-utan sang pila ka bulan ang proseso sang petisyon, hearing, kag konsultasyon antes makapagwa sang wage adjustment nga ginasilig niya nga ulihi na para sa mga mamumugon nga apektado sang gulpyada nga pagtaas sang presyo.
Nahibaluan nga sa amo nga hagna, ang Fuel Wage Shock Protection Law ang nagatuyo nga maghatag sang awtomatiko nga “shock allowance” sa oras nga maglapaw sa gintalana nga lebel ang presyo sang gatong kag pagkaon, nga wala na naga-agi pa sa malawig nga proseso sang wage board.
Pahayag niya, kinahanglan man nga dal-on sini ang tanan nga minimum wage earners sa bilog nga pungsod, ano man ang status sa trabaho.
Dugang pa sang natungdan, obligasyon sang gobyerno nga proteksyunan ang purchasing power sang mga mamumugon ilabi na sa panahon sang global shocks kasubong sang tensyon sa mga internasyonal nga suplay sang gatong.
Interviewed by Bombo Saira Joy Alu-ad Bautista | via Zona Libre
