Nagapanawagan sang dugang nga sweldo kag iban pa nga bulig halin sa gobyerno ang General Alliance of Workers Association (GAWA) sa Western Visayas.
Sa interview sang Bombo Radyo Roxas kay Wennie Sancho, Secretary General sang General Alliance of Workers Association (GAWA), iya ginpahayag nga kinahanglan nga madungan ang pagsaka sang sweldo bangud padayon nga pagmahal sang mga balaklon sa merkado.
Suno kay Sancho, nagaantos ang mga mamumugon bangud indi na nila masarangan ang ila kinahanglanon samtang padayon man nga nagahuyang ang balor sang piso.
Dugang pa niya, dapat man nga malakip ang mga minimum wage earners sa mga programa sang ayuda sang gobyerno bangud apektado man ang mga ini sang krisis nga ginapangatubang sang pungsod.
Nagalaum ang grupo nga mabatian sang Presidente ang ila panawagan para sa kaayuhan sang tanan nga mamumugon indi lamang sa rehiyon kundi sa bug-os nga Pilipinas.
