Nagapanawagan ang General Alliance of Workers Association sang P200 nga Emergency Relief Allowance para sa mga mamumugon sa Western Visayas.
Sa interview sang Bombo Radyo kay Wennie Sancho, Secretary General sang General Alliance of Workers Associations, iya ginpahayag nga ang nasambit nga panawagan ang may tinutuyo nga mabuligan mamumugon sa padayon nga pagsaka sang presyo sang gatong.
Suno kay Sancho, bangud sa wala ginalauman nga pagsaka sang presyo sang mga produktong petrolyo, nagtaas man ang mga presyo sang mga nagapanguna nga balaklon, produkto, kag serbisyo.
Gin-athag man ni Sancho, nga ang minimum nga sweldo sa Western Visayas ang halin P450 tubtob P550 sa kada adlaw.
Pahayag pa niya nga ang Regional Wage Board sa Western Visayas ang dapat magsuhestyon sang gilayon nga tikang agud mabuligan ang mga mamumugon nga makatabok sa kapigaduhon tuga sang mataas nga balor sang pagpangabuhi nga epekto sang mga indi kinaandan nga pagtaas sang presyo sang mga produktong petrolyo.
Dugang pa sag natungdan, importante nga mahatag ang pagsaka nga P200 sa labing madali nga panahon bilang pagpakita sang malasakit kag pagkilala sa mga mamumugon bilang isa ka “nagapanguna nga pwersa nga pang-komunidad kag pang-ekonomiya” nga ang pagpaninguha ang nagapasanyog sa manggad sang pungsod kag nagapasulong sa industriya.
