Nakulangan ang grupo nga General Alliance of Workers Association ukon GAWA sa ginaduso nga P11.08 billion nga pondo para sa Employment Assistance to Our Disadvantaged/Displaced Workers ukon TUPAD para sa tuig 2027.
Sa interview sang Bombo Radyo kay Mr. Wennie Sancho, Secretary General sang General Alliance of Workers Association, iya ginpahayag nga ang ginaduso nga budget ang nagalakip sang pondo para sa ginabanta 672,000 ka TUPAD workers sa bug-os nga pungsod.
Suno kay Sancho, importante nga lantawon kon paano ipatuman ang programa kag kon makalab-ot gid man ang kasubong nga pondo sa mga nagakinahanglan.
Ginpahayag man sini nga dapat maathag ang proseso sa pagpili sang mga benepisyaryo agud malikawan ang anuman nga iregularidad sa pagpatuman sang programa.
Ginhatagan pagtamod sang grupo nga importante para sa mga mamumugon nga may nagakaigo nga job opportunity kag indi lang magsalig sa short-term programs kaangay sang TUPAD.
Dugang pa sang natungdan, kinahanglan man nga pabaskugon ang mga programa nga makahatag sang mas malig-on kag malawig nga palangabuhian sa mga mamumugon.
