ROXAS CITY, CAPIZ – Nagapanawagan ang General Alliance of Workers Associations (GAWA) sang P50 nga emergency relief allowance (ERA) kada adlaw para sa mga mamumugon sa Western Visayas (WV).
Sa interview sang Bombo Radyo kay Wennie Sancho, Secretary General sang General Alliance of Workers Associations, iya ginpahayag nga kinahanglan ang pagtaas sang minimum nga sweldo sang mga mamumugon bangud sa kapaslawan sang Kongreso nga aprubahan ang P200 nga ginatalana nga pagsaka sang sweldo.
Bangud sa wala ginalauman nga pagsaka sang presyo sang mga produktong petrolyo, nagtaas man ang mga presyo sang mga nagapanguna nga balaklon, produkto, kag serbisyo.
Ginsambit ni Sancho nga ang Department of Labor and Employment (DOLE) kag ang National Wages and Productivity Commission (NWPC) ang nagabuliganay agud sabton ang mga isyu sa sweldo sang mga mamumugon sa pribado nga sektor.
Dugang pa sang natungdan nga ang Regional Wage Board sa Western Visayas ang dapat magsuhestyon sang gilayon nga tikang agud mabuligan ang mga mamumugon nga makatabok sa kapigaduhon tuga sang mataas nga balor sang pagpangabuhi nga epekto sang mga indi kinaandan nga pagtaas sang presyo sang mga produktong petrolyo.
Suno kay Sancho, ang mga pagtaas sang presyo sang mga produktong petrolyo kag mga nagapanguna nga balaklon kag serbisyo ang nagahuman sang isa ka “supervening condition” nga magahatag-rason sa pagguwa sang isa ka wage order apisar wala sang petisyon gikan sa mga mamumugon ukon sa sulod sang one-year ban period.
Pahayag pa sini nga ang minimum nga sweldo sa Western Visayas ang halin P450 tubtob P500 kada adlaw.
Tubtob Oktubre 2024, may masobra 193,000 nga mamumugon sa Western Visayas nga direkta nga magabenepisyo sa pagtaas sang sweldo ukon emergency relief allowance, kag masobra 300,000 nga mamumugon nga nagakita sang masobra sa minimum nga sweldo nga indi direkta nga maapektohan sang sini nga ayuda.
Suno pa kay Sancho nga ang kantidad nga ihatag, kun ini man ang pagsaka sang sweldo ukon emergency relief allowance, ang indi dapat magnubo sa P50 kada adlaw, nga magaserbe nga gilayon nga bulig pang-ekonomiya.
Dugang pa importante nga mahatag ang pagsaka nga P50 sa labing madali nga panahon bilang pagpakita sang malasakit kag pagkilala sa mga mamumugon bilang isa ka “nagapanguna nga pwersa nga pang-komunidad kag pang-ekonomiya” nga ang pagpaninguha ang nagapasanyog sa manggad sang pungsod kag nagapasulong sa industriya.
