ROXAS CITY – Nagalaum ang mga general managers sang nagkalain –lain nga electric cooperatives sa bug-os nga Panay Island nga pamatian sang Department of Energy (DOE) ang mga rekomendasyon agud indi na masulit ang 3-day power outage sa Western Visayas.
Sa interview sang Bombo Radyo kay Engr. Edgar Diaz, General Manager sang Capiz Electric Cooperative (CAPELCO) suno diri antes pa ginhiwat ang senate hearing nga ginakaulamiran sang National Grid Corporation of the Philippines (NGCP) natuhoy sa malawig nga power outage, nakighinun-anon na ang tanan nga general managers sa Panay Island agud magdihon sang ila mga rekomendasyon agud mapaayo ang ginatan-ay nga serbisyo.
Ginrekomendar sang kooperatiba, una amu ang pagpadasig sa construction sang Cebu-Negros-Panay Grid nga yara pa lang sa 70% development agud maka-energized sang bag-o nga submarine cables halin sa Negros padulong sa isla sang Panay.
Pinaagi sini, makabaton sang bastante nga suplay sang kuryente ang Panay Island kag maresolba ang isyu natuhoy sa power congestion.
Ikaduha, amu ang pagbakal kag install sang Static VAR compensator isa ka sahi sang equipment nga nagadeterminar kag nagahaboy sang oscillation sa grid kag nagakontrol sa anuman nga grid disturbances agud indi magcollapsed kag ma-eksperensyahan ang lapnagon nga blackout.
Nagalaum man sila nga mahatagan sang igatalupangod ang full transparency information kag patas nga allokasyon sang power supply.
Suno diri, ang normal operation sang kooperatiba ang yara sa 60hz apang sa tion sang problema naganubo ini kabangdanan agud magshutdown ang mga konektado nga planta.
Dugang pa ni Diaz, mas maayo kun naka-separar ang system operation kag transmission operator para sa mas detalyado kag transparent nga rason pananglitan may power outage.
Ginrekomendar man sang kooperatiba, ang liwat nga pagbuhi sa Grid Management Committee, komitiba nga responsable sa imbestigasyon kag nagahatag sang sanctions sa mga nagbayular.
Nagalaum si Diaz nga pinaagi sa mga nasambit nga rekomendasyon indi na masulit ang lapnagon nga blackout nga nagresulta sa pagkapiyerde sang madamo nga negosyo sa Panay Island.
Mahibaluan naglab-ot sa masobra P2-M ang nangin kapiyerdehan sang CAPELCO bangud sa power outage.
Matandaan naglawig sa tatlo ka adlaw ang blackout sang Enero 2-5, 2024 humalin sang hinali nga nagshutdown ang isa sa pinakadaku nga power plant nga nagasuplay sang kuryente sa bug-os nga Panay Island.
Magluwas pa diri ang lapnagon nga black out nga natabo man sang Abril 2023.
