Ginpiyerde sang Gilas Pilipinas ang Latvia sa kaugalingon nga court nila sa iskor nga 89-80 sa FIBA Olympic Qualifying Tournament.
Gin-angkon sang Gilas ang hampang sumugod first quarter tubtob last quarter kun sa diin wala sini ginpalamang pa ang World Number 6 nga Latvia sa ila nga court nga ginhiwat sa Riga Arena sini lang nga maga-aga sang Huwebes sa Pilipinas.
Naglab-ot pa sa 26 points ang lamang sang Gilas tubtob napanubo ini sang Latvia sa 10 points sa ulihi nga minuto sang last quarter.
Samtang, ginakabig nga isa ka kasaysayan ang kadalag-an sang Gilas bangud magluwas sa ranked number 6 ang Latvia sila pa ang pang- fifth placer sa FIBA Basketball World Cup sadtong nakaligad nga tuig nga ginhiwat sa pungsod.
Nanguna sa kadalag-an sang Gilas si Justin Brownlee nga nagpagkit sang 26 points, siyam ka rebounds kag siyam ka assists.
Masunod nga makasambuwa nila amo ang Georgia subong nga huwebes takna alas 8:30 sang gab-I sa Pilipinas kun sa diin kun magmadinalag-on sila sulod na ang mga ini sa semifinals.
Mahibaluan nga sining nakaligad nga adlaw lang ginpiyerde sang Latvia ang Georgia sa iskor nga 83-55.
