Ginkabos sang duha gid lamang ka puntos ang Gilas Pilipinas sa ikaduha nga tune-up game sini sa Europa bilang preparasyon sa FIBA Olympic Qualifying Tournament.
Nagtapos ang exhibition match sa skor nga 82-80 pabor sa World no. 15 nga Polish national team.
Ginpatigayon ini sa Sosnowiec, Poland pila ka adlaw matapos nalutos man ang World No.37 nga Gilas sa kamot sang Turkey sa una nga friendly game, 84-73.
Sa latest nga hampang, nagpanguna sa Gilas ang naturalized import nga si Justin Brownlee nga may 30 points, ginasundan ni Dwight Ramos nga may 16 points, kag Junemar Fajardo nga may 10 points.
Kasunod sini nga duha ka mga hampang, magadiretso na ang Gilas Pilipinas sa Riga, Latvia para sa Olympic Qualifiers nga magasugod sa Hulyo 2-7.
Ginakabig nga underdog ang Gilas Pilipinas sa Group A kun sa diin makasumpong sini ang host nation, heavy favorite, kag world number 6 nga Latvia kag ang world number 23 nga Georgia.
Kinahanglan nga makalab-ot ang national team sa at at least top two sa group stage agud nga makatapak sa crossover semifinals. Ang winner lamang sa FIBA Olympic Qualifying Tournament amo ang makakuha sang ticket para sa Olympic Games Paris 2024.
Ginalantaw nga daku nga pagpanghangkat sa nationals ang injuries nga naangkon nanday AJ Edu, Jamie Malonzo, kag superstar guard nga si Scottie Thompson apang wala na nagdugang si Coach Tim Cone kag nagpabilin sa 11 sini ka players bangud suno sa iya, indi man sini ubos ang 11 kag naanad na ini sa eight ukon nine-man rotation.
