Ginkumpirma sang Samahang Basketbol ng Pilipinas (SBP) nga indi makaupod sa team ang mga standouts sang Gilas Pilipinas nga sanday Dwight Ramos kag AJ Edu para sa 20th Asian Games nga natalana nga hiwaton sa Aichi-Nagoya, Japan subong nga Setyembre.
Suno kay SBP Executive Director Erika Dy, nagtuhaw ang scheduling conflict bangud ang duha ka players ang natalana nga mag-intra sa B.League Manila Games sa Setyembre 9 kag 10. Si Ramos ang magahampang para sa Levanga Hokkaido, samtang si Edu ang maga-suit up para sa Gunma Crane Thunders.
Ang Asian Games men’s basketball tournament ang natalana sa Setyembre 10 tubtob 20, kon sa diin ang Pilipinas magatinguha nga depensahan ang Gold meadal nga ila nakuha sa Hangzhou, China, sang 2023.
Samtang, ginpahayag ni Dy nga ang SBP nagsumite na sang shortlist sang mga humalampang nga mahimo magkumpleto sang Gilas “Final 12” para sa Asian Games, bisan pa nga ang lineup nagapabilin nga subject sa pagbag-o antes ang final roster submission.
