Apisar nga naga-atubang sang matig-a nga kasumpong, determinado sa gihapon ang Gilas Pilipinas nga makakuha sang bulawan nga medalya sa FIBA Asia Cup subong nga bulan.
Ang amo nga kadalag-an wala pa matigayon sang pungsod sa nagligad nga apat ka dekada.
Suno kay Gilas head coach Tim Cone, tinguhaan sang team nga makalampuwas sa elimination matches kag makalab-ot sa final stage sang kompetisyon agud makadala pauli sang gold para sa Pilipinas.
Ang national team nagalinya upod sa Chinese Taipei, New Zealand, kag Iraq sa idalom sang Group D. Ang No. 1 sa apat ka mga team pagkatapos sang una nga elimination round ang awtomatiko nga makasulod sa quarterfinals.
Ang No. 2 kag No. 3 may tsansa pa nga makasulod sa top-8 nga pwesto sa crossover playoffs.
Ang una nga hampang sang national team ang natalana sa Agosto 6 batuk sa Chinese Taipei kag pagasundan sang hampang batok sa New Zealand sa masunod nga adlaw (Agosto 7).
Ulihi nga atubangon sang Gilas ang Iraq sa Agosto 9.
Sa subong, ginpahayag ni Cone nga solido ang lineup sang pungsod nga ginapangunahan sang mga seasoned basketball players kaangay nanday Justin Brownlee, June Mar Fajardo, Japeth Aguilar, Chris Newsome, Kevin Quiambao, kag iban pa.
Ang Australia amo ang nagadepensa nga kampeon sa FIBA Asia Cup. Natigayon sang pungsod nga madala pauli ang tropeyo sa nagligad nga duha ka torneyo.
