ROXAS CITY-Gin-athag sang Municipal Health Officer sang banwa sang Cuartero nga may yara sang abiso gikan sa Capiz Provincial Health Office ang pagpalubong sa 47-anyos nga manunudlo nga ginbawian sang kabuhi sa Cuartero Municipal Cemetery matapos nga nagpositibo sa COVID-19 kag temporayo nga nagapuyo sa banwa sang Mambusao.
Sa interview sang Bombo Radyo kay Dr. Winfred Rivera ginkompirmar sini nga sa nasambit nga patyo ginlubong ang nagpositibo nga manunudlo bangud tumandok ini sa banwa sang Cuartero.
Suno kay Rivera nga personal nga naglaong sa iya ang himata sang napatay nga ilubong sa nasambit nga patyo ang manunudlo bangud wala sang bakante nga lulubngan sa banwa sang Mambusao.
Apang gin-athag sini nga may yara ini sang abiso gikan sa PHO nga pahanugotan nga ilubong sa nasambit nga patyo ang napatay nga pasyente sa pihak nga sa banwa sang Mambusao ini nagatiner.
Samtang, gin-athag man ni Rivera nga wala sang dapat kahangaw-an ang publiko matapos nga madamo sang mga pumuluyo ang nabalaka matapos nga ginlubong ini sa nasambit nga patyo.
Ginpahayag ni Rivera nga manubo ang tsansa nga makalaton ang napatay nga COVID-19 patient.
Magluwas diri, gin-athag man sini nga nagsunod man sang health protocols ang mga indibidwal nga naglubong sa napatay nga manunundlo
